Qng Aldo Mung Beitan Diciembre 18

Qng Aldo Mung Beitan

Diciembre 18

by Gory Dary (Talipanpan neng Gng. Gregorio C. Dayrit)

Ua baluan mu qng minuna, pilcaran mu neng patanid,

Ing mebigu mung Poetang migale qng "Ecu Malit."

Dapot nung deang bulaclac ilang cacu misisitsit

Qng aldo mung quebaitan, macananung ecu dalit?

Sisitsit da man canacu, picamuan, sana emula,

Uling era naman balu, sinabi ramu karela,

Deang maralas daralo, munta queni, munta queta

A balisang limpad, limpad, masalitang mariposa.

Tabalu ding mariposa ba't carelang camalayan?

Ing malijim nang panaslag ning aldo mung quebaitan?

Dapot, canitang sabi ra, carela mu namang dimdam,

Caring malagu nang Hadas ning lebasan dang caqueuan.

At ding Hadas quitnan cula, tajimic la't e bubulad,

Nune, ing cacu ra tiru, ing bunduc ning "Nabanlag."

Memintu cu't pintalan que, at layun cu pang minuquiat,

Uling ing canacung nasa magcang carin cu amalas.

Nanuman, ala cung disan pangaras cu cababauan,

Balacu, miras na cacu, wakas ning sablang lelangan,

Dapot cabud meliquid cu qng planas banda cung wanan,

iquit que ing larawan mu, lalauan nacu't titimanan!

Guinalang que't delanginan, dapot biglang merine cu,

Uling ala cu mang bitbit para qng beitan mung aldo.

Dapot ngening balu muna qng yamu ing caguiuan cu,

Damutan me't daraun que ing "pusu" ning calulu.